yogi

鄧小平
乜野股票大鱷都唔係最可怕，o個o個謠傳患左睪丸癌既既先至可怕。
連Ｄ大鱷入市之前都要問聲佢：
你個睪丸冇事丫o麻？
全世界仲有邊個股票市場好似香港咁，係睇住一個人既古古黎運作ｇａｒ？
聯交所每日開波之前，都要全部一齊祈禱：
願他的古古永遠長存，阿門。
然後先至可以開市！
但係佢既古古可以長存幾耐，邊個知呀？
而事實上，佢家下仲有冇古古我地都唔知啦。
唔好誤會呀，我唔知幾希望，最好家下有個女仔 o係中南海走出黎，話俾佢污辱左。
咁就即係話佢既古古仲好健康。
真人對話
黃：o個陣仲未有１７３呢Ｄ熱線電話，我就已經用我既天才，構思左一種主動７３１
熱線！你唔需要打俾我，我會夜晚晚主動打俾你！
張：講乜呀？
黃：你依家隻手擺o係邊呀？
　　你又知唔知我隻手擺o係邊？
　　只要你話俾我知你隻手擺o係邊，我就可以估到你既年齡，生日同埋血型。
張：反應好唔好呀？
黃：深受一般家庭婦女歡迎！
張：咁咪賺好多？
黃：過得去啦，晚晚做到天光。不過我到依家都唔知點收錢。
　
黃金屋
o係香港發達，就要訓街ｇａｒ　ｌａ！
我有冇計錯數？Ｄ樓一萬蚊一尺，一間三百尺既樓，係咪三百萬？
三百萬既樓，首期要俾三成，就係一百萬。
乜野人可以有一百萬既現金呀？
賣左你住緊個躉樓囉！
係呀，你要買一躉樓，首先就要有另一躉樓。
呢個人點解會有另一躉樓呀？啊佢原來就有另一躉樓囉。
咁佢第一躉樓點黎呀？
啊，唔知ｇａｒ，宇宙點黎丫？大爆炸爆出黎ｇａｒ！
你咪去同你女友講：得ｌａ我就黎有黎樓啦，就黎爆出黎ｌａ！
係呀，以我地既知識，係唔可以明白一個人點樣可以得到第一躉樓。
我地只知道牛頓既第八定律就係：
有樓有樓，冇樓冇樓，有樓可以變冇樓，冇樓就永遠都冇樓！
　
搵食
冇人鐘意做野，而最唔鐘意做野既人，就係o係葡京賭場派２１點個Ｄ女人！
據我所知，好多就黎要結婚既女仔，都會去葡京睇下，習慣下Ｄ家婆面孔呀！
個Ｄ女人，塊面成日都好黑既，郁Ｄ就反起對眼。
當然，你會諗，佢地成日要對住班好貪錢既人，對住佢地大聲嗌：爆爆爆！
確實並非最愉快既生活。
但係另一方面，佢地派牌，佢地嬴，公司就賺錢，佢地輸，顧客又俾貼士佢地。
當然唔係事必要你俾，但係你又試下唔俾丫。
即係無論輸嬴佢地都立於不敗之地，咁點解佢地嬴又反眼，輸，又反眼呢？
聽講個套恐怖片「驅魔人」，o係套戲裡面個上左身既女仔，隻眼反左去後邊，就係跟
葡京呢班人學ｇａｒ　ｌａ。
點解Ｄ人話葡京好邪呀？
o拿o拿o拿，你睇佢又反眼ｌａ又反眼ｌａ↓
嬴你又唔o岩，輸你又唔o岩，咁點先o岩？
唔通要Ｄ顧客鋪鋪大聲嗌：「和和和」你先高興？
對唔住，和，都反眼！
「冇得o岩，要做我就唔o岩！要做我就反眼。我係鬼上身ｇａｒ　ｌａ。怕鬼就唔好睹
！唔好睹走啦！咪阻住我滴眼藥水！」
我地咁受氣，又輸多嬴少，都要去葡京，點解？
因為當我地去到葡京，睇到呢Ｄ咁唔鐘意做野既人都o係到做緊，我地Ｄ所謂唔鐘意做
野，算係乜野丫？
以後做野有乜唔高興，反下眼咪算囉，一反解千愁！
　
狗
各位，如果你有養狗，你不妨細心觀察一下。
無論你隻狗有幾開心，o係開心既背後，佢永遠有一層更深既哀愁。
o個份哀愁，就係來自當你放工番到屋企既時候，佢唔能夠同你講：
「唔好換衫，出街食飯，我請！」
　
大款
大陸Ｄ富豪流行食金，飲金酒，食金。
對大陸人黎講，香港最好既餐館係周生生或者謝瑞麟！
「唔好講咁多，肚餓呀，整兩隻龍鳳呃黎o趙住先！」
　
毛主席
鄧小平唔明白，已經冇人再關心毛澤東o係歷史裡面既價值。
大家只係關心佢既市場價值。
毛澤東思想仲存唔存在唔重要，最緊要，係毛澤東條屍仲存在！
因為佢條屍仲搵到錢！仲有人帶隊去睇！
將來，仲可能可以一次過搵一大筆添！
有個日本仔，用破晒紀錄既價錢買左一個梵高既油畫。
佢話，佢死個陣，會燒左幅畫黎賠葬！
我相信有一日，我地會將毛澤東囉出黎拍賣！
「２０億一次，２０億二次，２０億三次恭喜你陳生，毛主席係你既！」
我地主席，點都應該賣得高過幅油畫既。
但係值得既，你可以同秦始皇講：你得兵馬俑咋？我有毛主席！
嫌浪費唔一定要買黎賠葬，買黎抄就夠好啦！
全世界，有邊個諗到原來最值錢既標本，唔係獅子老虎，而係自己既國家領袖！
華盛頓，林肯，邱吉爾，甘地，一個二個，冇晒啦。
都係我地中國人犀利！留番條標本！
　
特技
張：我o係街上面見過最美麗既事，唔係情侶裝，唔係沙灘長跑，唔係當眾接吻，而係o
係巴士上面一個情侶為對方撩耳仔！會震家麻，唔驚！直情將耳膜既終身幸福付托俾對
方。
黃：大家想像下，你執住你情人既耳仔，你望入個耳窿，直望到愛人既心坎裡面，然後
輕嘆一聲，啊↓↓油耳呀！多麼浪漫↓
張：重有！
　　你有冇試過，當你既情人沖涼o個陣，o係同一時間，同一個地點，你o係旁邊大便
！
　　如果你未試過，你未試過真正既愛情！
　
搵食
細個我最想就係快高長大，出黎做野，搵錢！
好ｌａ，幾經辛苦，終於大個仔ｌａ。可以出黎做野ｌａ。
我就發覺，原來我唔鐘意做野，我剩係鐘意錢咋。
咁真係好大鑊，咁就即係，一個人唔鐘意做愛，剩係鐘意高潮。
　
領導人
最近克林頓為左呢 Ｄ性醜聞，一身蟻。
喂，你話，就睇個樣，李鵬咸濕定克林頓咸濕Ｄ？
我身為男人，我話你聽，我肯定，佢地一樣咁咸濕！
但係李鵬從來冇呢Ｄ野，莫講話性醜聞，連緋聞都冇！
係咪真係冇呀？唔知！唔講得！國家機密！因為佢就係領導人！
身為中國既領導人，任何醜聞，莫講話生前唔敢講，死後都唔可以提！
毛澤東有冇溝過女呀？冇！
有冇俾女溝過呀？有，江青！
咁佢下半生咪剩係同江青乜野過？咁咪好慘？
唔好再問，再問坐十二年！
呢Ｄ先叫做領導人呀麻！
　
相對論
我躉樓係用相對論既原理設計既。
相對論話：空間唔係絕對既。
咁即係話，一個空間，可以有多過一個面積啦。
我躉樓，就有一個空間，兩個面積。
一個係實用面積，一個係建築面積。
罵人
以前我地笑人，會話：
你有得發達？太陽o係西邊出黎呀！
依家我地就會話：
你有得發達？建築面積等如實用面積呀！
又或者話人醜，我地都會技巧好多：
你唔醜，你點算醜呀，你係塊面唔多實用咁解麻。
你既鼻台太大呀。
Ｄ眼耳口鼻咪唔見洗囉。
　
天人合一
有Ｄ朋友覺得我間屋太細，呢個係角度既問題啦。
即係譬如我依家o係個廳度，我就會當個廚房同廁所都係個廳既一部份。
試問在座有邊位個廳有抽油煙機又有馬桶呀？
又譬如我坐廁所，我又會當個廳個睡房都係廁所既一部份。
嘩，一個有廳有廚房既廁所，去邊度搵呀？
我間屋直情令我明白，何謂天人合一：
一部份等如全部，全部等如一部份！
　
用家炒家
好多人結婚，最初就以為自己係婚姻既用家，後來先發覺其實自己係台感情既炒家，於
是想離婚。
但係離婚又要攪幾年，睇住周街都係新盤靚盤，自己個盤又放唔出，幾難受！
　
香港文化大革命
１９７６年，文化大革命o係大陸告一段落。
呢個時候，香港既文化大革命就開始ｌａ。
o係果一年，香港人將「識個女朋友」呢個講法，正式改為「溝一條女」。
初時，呢個革命遭受到好多既阻力。
第一個最反動既勢力，當然就係教育界啦。
我仲記得當時我有個同學，o係一個教中文既老師面前講左句：
「我想溝o個條女。」
個老師就捉住佢訓話：
「女仔，係一個個既，唔係一條條，番去罰抄『一個女仔』一千次。」
個同學話：「睬你都傻。」
老師就話：「你駁咀？你條死仔駁老師咀？」
　
醫學界亦覺得無所適從，佢地認為：
「如果有一條女黎醫院，咁究竟應該俾佢睇病呀？定係研究佢呢？
　因為一條既女仔，係好罕有既。」
　
辯論得最激烈既，當然係法律界啦：
「如果一個人立遺囑，話將Ｄ家產俾晒佢條女。
　咁佢條女究竟係佢個女呀？定係佢女朋友呢？
　又或者呢個人直情將佢自己個女叫做佢條女，
　佢算唔算犯左亂倫罪呢？」
　
邏輯學上黎講，如果你叫得一個女仔做一條女，基本上你唔當個女仔係人，你當佢係一
樣死物。
咁發展落去，你會叫你阿媽做一件老母，你爸爸做一餅老豆，你Ｄ兄弟姊妹做一揪細佬
妹。
　
呢個革命發展落去，越黎越波濤壯闊。
我地以前o係男女關係裡面常用既字眼，通通被一Ｄ通常唔會用o係人身上既字眼黎代
替。
譬如話：
識女仔就係溝條女啦；
鐘意佢就係o答佢；
錫佢就叫做咀佢；
拖下佢就叫做渣佢；
同佢親熱就叫做扑佢！
問世間，情是何物？
答案係：溝、o答、咀、渣、扑！

新鮮
依家Ｄ人溝女，對條女最大既要求係乜呀？
唔駛靚，最緊要，係夠新鮮！
乜野叫做夠新鮮呀？
就係話，溝左一年果個，就唔夠溝左半年果個咁正。
因為半年果個新相識，新鮮Ｄ。
同樣，溝左半年果個，就唔夠三個月咁正。
溝左一個月就唔夠半個月果個咁正。
溝左一日就唔夠半日果個咁正，如此類推，終於...
溝左果件，就唔夠未溝果件咁正！
咁即係點呢？
仲溝唔溝好呢？一溝就唔正ｌａ！
　
第三世界
一個蘇丹人，佢要搬屋，佢囉起支棍就行啦，幾瀟洒。
「你係人人搬運麻，o岩啦，幫我搬碌棍啦，係咁多ｌａ！」
一個孟加拉人同你講：
「我做一日野既報酬，就等如你一罐汽水！」
幾ｃｏｏｌ呀，直情係汽水廣告咁呀。
「我做一日野，就係為左呢支維他，ＹＥＡＨ！」
　
正面Ｄ呢睇，有個印度人，成間屋，乜都冇，真係乜都冇，但係佢有一打仔女，乜都冇
都堅持要一打仔女，o係現今社會仲邊有咁著重家庭觀念既人？
你再諗下，佢地生仔生得幾豪氣？
你地就計劃，生一個定兩個！
佢地就話：「生一隊定兩隊呢？籃球隊定足球隊呢？」
佢地節育既意思就係唔好生後備ｌａ！
　
如果大家去到呢Ｄ地方旅行，要小心，因為大家既文化好唔同。
最重要既，就係千祈唔好大便。
唔係唔好食野，咪分Ｄ俾人食囉。
唔好大便，你一大便，就會好多人埋黎睇，對住你個籮友讚嘆：
「ＳＨＩＴ！ＨＯＬＹ　ＳＨＩＴ！」
因為你大便裡面既營養，仲多過佢地Ｄ食物。
　
所以o係果Ｄ地方，最折墜既人，唔係浪費食物既人，因為冇得你浪費！
而係唔吸收到最盡就排洩出黎既人，果Ｄ就折墜ｌａ！
「食完飯冇幾耐就去廁所，咁折墜呀你？」
我地香港，興攪飢緊三十。
佢地都有攪，不過佢地就係攪忍住三十！
　
污染
臭氧層個窿引致既災害幾時擴散到香港我就唔知，
但係如果大亞灣果舊野出事呢，就邊到都唔駛去。（果舊野＝核電廠）
Ｄ警察又打爛晒Ｄ要黎走私用既大飛！
不過用大飛都冇用啦，因為到時成個海既魚都會俾幅射影響左，識得講野，佢地會圍住
你部大飛同你講：
「喂，俾陀海費呀！」
「咩呀，扮聽唔到呀？當我雙花紅衫無料到呀？」
　
老豆老母
我聽人講過，我好似有兩個老豆既。
一個叫共匪，一個叫國賊。
個名唔係我改既，佢兩個情敵黎丫麻，為左爭我阿媽咪起個花名唱衰對方囉。
我阿媽就叫做中國，乳名就叫江山，花名叫做地盤，好多人爭......
　
環保
如果我地都認為環保係遙遠既野，何況係果Ｄo係飢餓同埋戰亂中既人？
你都唔好意思啦，人地輪緊紅十字會派飯，你仲同人講：
「唔好搵膠袋裝飯呀，唔環保呀。」
人地打緊仗，搵車逃亡，你就同人講：
「點解你唔用無鉛汽油呀？」
　
女人
黃：o係愛情之中，女人最偉大！
　　男人既犧牲，係為左追求美麗，而女人既犧牲，就只係得到一個麻甩佬！
　　而最偉大既係佢地根本唔覺得係犧牲！
　　如果你話俾一個女人聽，喂，你男朋友有口臭！
張：車，人梗有局部缺點既！
黃：佢仲有臭狐同香港腳喎！
張：咁佢咪好平均咯！
黃：佢鼻鼾聲好勁喎！
張：我男朋友一定係夢見我，好開心。
黃：佢屙尿亂咁啡！
張：好壯呀！
黃：佢唔洗手喎！
張：邊有男人洗手架？
黃：我有！
張：姆型！
黃：佢仲講粗口呀！
張：但係佢心地好！
黃：佢o係電梯度食煙喎！
張：公眾場合都唔俾食咯，佢咪呢埋一邊食囉，你地仲想點呀！
情緒
我鐘意番工！
o係工作既世界裡面，最重要既，係工作同表現，情緒，係冇地位既。
從來冇一個員工可以同上司講：
「經理，你冇理由唔升我架喎，過去果一年，我係幾咁空虛寂寞，公司唔係唔知架！」
亦都從來冇一個上司會同個下屬講：
「你知我點解加你人工？唔係因為你表現好，係因為你心情好！你成日都好似好ｈｉ
咁，公司好欣賞！」
　
狗仔改名
你有冇留意好多叫做ｌｕｃｋｙ既狗，佢既主人，多數都係Ｄ唔多ｌｕｃｋｙ既人。
Ｄ主人就係覺得自己太霉ｌａ，先叫隻狗做ｌｕｃｋｙ。
我又識個導演，好耐冇戲拍，於是就養左隻狗，幫佢改個名做ａｃｔｉｏｎ！
佢日日o係屋企對住隻狗嗌：ａｃｔｉｏｎ！ａｃｔｉｏｎ！
真係睇到都心酸。
聽講彭定康都係買多左隻狗，改左個名叫「魯平」。
「魯平，ｓｉｔ！魯平，囉份報紙俾我！哈哈哈...」
我都買左一隻狗。
我諗左好耐幫佢改個乜野名。
我唔想好似Ｄ人咁黐線，改隻狗既名叫乜野lucky action 魯平呀咁！
我覺得，我養隻狗，無非就係想佢陪下我，我叫佢既時候，佢就埋黎乃下我咁。
所以我幫佢改左個名，叫做「乃下我啦」！
我叫「乃下我啦」，佢就埋黎乃我，幾直接呢！
　
大時代
張：我地而家已經進入左一個空前既集體大淘汰既年代，係一個打二百個既淘汰賽。
黃：乜野意思？
張：係香港要以六百萬人面對中國十二億人口既競爭，比例係一對二百。
黃：有冇試過隻抽隻？
張：有
黃：嬴定輸？
張：輸，爆晒缸，醫院都唔收。
黃：有冇試過隻抽兩，一個打兩個？
張：有。
黃：嬴定輸？
張：嬴！
黃：點會嬴？
張：跑嬴！
黃：一個打二百個，跑都冇得跑。
張：如果你整水喉，河南會有成條水喉村同你一個爭！
黃：如果你安插蘇既，山東會有成個插蘇縣黎插死你！
張：而家係咪好羨慕你Ｄ菲傭呢？
　　冇用，單單廣東省就有四個菲律賓、五個印尼、六個泰國。
　　菲、印、泰傭，走！
黃：你會話你只係個家庭主婦，唔駛知咁多！
　　但係大陸有八十二個二奶市，你老公知道晒o係邊！
張：你話呢Ｄ係你爸爸媽媽既事，你唔駛知道。
　　不過單單o係佛山，你已經有三十五個兄弟姊妹，
　　等緊你去玩具反斗城買野送俾佢地！
黃：地址送去邊？
張：佛山二奶市插蘇縣水喉村８號前座。
黃：但係好彩佢地得鋪牛力，我地香港仔，食腦加麻！
張：不過好可惜人地食阿公架喎。
黃：車，我地有尖端既資訊，尖端既科技。
張：但係人地又有尖端既人事關係喎！
　
悶人
每當禮拜六晚，當所有人都出左去劈酒，跳舞，做愛，做世界...
我就會好想有個人打個電話俾我，叫我出去。
你知禮拜六晚，全世界最好聽既聲音係乜？
係電話o個把聲：「鈴鈴...鈴鈴...」
我鐘意呢把聲，我甚至將個電話駁左落套ｈｉｆｉ到。
「鈴鈴...鈴鈴...」
但係我好耐都冇聽過ｌａ，終於，有一晚，佢響ｌａ：
「鈴鈴......」
我唔捨得囉起個電話，把聲音實在太美妙ｌａ。
跟住佢就收左線。
但係唔怕，我套ｈｉｆｉ自動錄左音，我不斷重播，聽左成晚！
「鈴鈴......」
　
睇電視
Ｄ人話，電視機仲衰過遊戲機，遊戲機，就呃你錢，電視機呃你時間。
幾多人，睇睇下電視，唔經唔覺就上當ｌａ：
「我果幾個鐘頭呢？頭先明明o係度架架！嘿，又俾佢扒左！」
係呀，個Ｄ藝員監制編導，其實即係老千黎之麻。
成日想盡辨法呃你個幾個鐘頭。
但係我唔怕老千，你呃我錢就話姐，你呃我時間？你要幾多呀？
每日俾五個鐘頭你好未？
唔夠？俾夠十個鐘你！
仲唔夠？係咪想玩到咁大先？
好，你唔好話我聽你乜野節目，我晒冷！
我俾晒二十四個鐘頭俾你！
我話之你做乜我都夠膽晒你冷，我就咁望住個電視機都可以望廿四個鐘！
我睇電視，冇人可以大到我！
　
捐血
我以前係好老土既。
要我將自己身體裡面既液體過俾第個人，又唔係做愛喎，我唔制。
一係咁ｌａ，捐俾你都得，你要俾我攬住黎捐。
朋友
張：做朋友梗要好玩啦，咁點先叫好玩？
　　首先既係佢一定要有先進既電子通訊設備，ｃａｌｌ機呀，手提電話唔少得。
　　但係如果佢用果Ｄ係Ｄ網絡好差既，打親去都：
　　對唔住，你而家打既電話唔通，請稍後再打黎。
　　呢Ｄ人係冇誠意交友既，以後唔好搵佢。
黃：如果佢既網絡冇問題，收得好清淅，但係等成三個字都唔覆機既，
　　唔緊要，ｃａｌｌ多佢一次，留台講底，絕交！
　　佢地幫你落呢Ｄｃａｌｌ架！
張：好喇，佢通訊設備冇問題，又即時覆ｃａｌｌ，仲即刻約埋時間，
　　一齊去邊度ｈａｐｐｙ，但係佢放你飛機↓↓
黃：仲有皇法既？
張：呢Ｄ二五仔賣友求榮，千古罪人，同佢絕交便宜左佢！點做？
黃：搵人打鑊佢，唔駛怕，就算佢報警差佬都唔幫。
　　有Ｄ朋友同佢去食飯，冇相熟酒家既，都算喇！
　　你幫佢搵埋，俾佢點菜。佢話：
　　是但啦，隨便啦，我乜都食架。
　　我問你食乜你話乜都食，咪即係我問邊個o係廁所，你話我！
　　鬼唔知係你咩！
張：食完去卡拉ＯＫ，有Ｄ人永遠唔搶咪！
　　好，我地忍你。
　　到人人都唱左四輪，佢仲話：
　　得架啦！你地唱啦，我o係度聽得架啦！
　　遇到呢Ｄ友仔，大家就一齊偷偷地去廁所，由後門鬆人。
黃：唔打鑊佢呀？
張：等佢埋左張單，o係門口先打佢！
黃：有Ｄ朋友好鐘意講心事，呢Ｄ好理所當然。
　　但係你講得激Ｄ先得架！
　　最激果次都激唔過警訊，真係悶到我報警呀！
張：而咁多種朋友裡面一種朋友係你最最最需要提防既！
　　就係果Ｄ問你借錢既朋友！
黃：冇錯啦！當一個朋友問你借錢既時候，就係表示佢想同你絕交。
　　試問有邊個借過你錢，仲仍然係你朋友丫！
張：所以遇到一個問你借錢既人，你第一樣野要諗清楚既，
　　唔係佢會幾時還錢，而係要自我檢討：
　　我呢排係咪好奄悶呢？我上次點菜係幾時呢？
　　我係咪真係玩無可玩，搞到人地要問我借錢呢？
黃：冇錯喇各位朋友，當你父母兄弟姊妹問你借錢，
　　你就要認真檢討下，
　　究竟↓↓我係咪佢地親生既呢！
　
讀得書少
我唔怕醜講一句，o係我廿歲之前，
我一直都以為毛澤東同蔣介石係兩個地方名黎。
咁係丫麻，依家Ｄ人番大陸都仲話要去睇下毛澤東，
咁我咪以為係七星岩果種名勝黎之麻。
　
光復
我就真係唔明，日本仔打中國打左咁多年，
我地真係冇要求任何條件就俾佢投降！
就算攪唔到乜野割地賠款呀，
係咪↓起馬以後我地中國人買日本野，
都應該有個八折先？
我地應該諗Ｄ方法提醒佢地。
我地應該去日本開便利店，但係唔係叫７－１１，
係叫９１８！
思樂冰就冇ｌａ，抗日兵就大把！
買避孕套呀？
南京牌好唔好？趕盡殺絕一定冇仔生架！
　
鬼佬好
Ｄ鬼佬地方真係好。
o係佢地住果區行，你唔駛驚行行下會有人盤你：
你邊度架？你第幾座呀？
至多咪同你講聲：
一兜白能希里。（ｕ　ｄｏｎ'ｔ　ｂｅｌｏｎｇ　ｈｅｒｅ！）
Ｄ鬼妹又靚，個個都白白淨淨，污糟果個都白既。
個個Ｄ鼻又高，鬼咁好鼻運。
而最緊要，Ｄ鬼佬有公德心！
鬼佬唔會亂拋垃圾，果Ｄ垃圾係來路貨，點算係垃圾？
鬼佬又唔會當街打仔！
我o係我住果頭，都唔知見幾多細路，
臨番到屋企門口都要提一提佢阿媽：
阿媽，今日o係條街到你未打過我喎！
啊，係咩？出番黎，死仔，你仲喊下麻？
阿媽，我冇喊喎！
唔喊呀麻，硬頸呀麻？！
鬼佬又唔會一邊睇戲一邊講野！
你睇下Ｄ香港人去睇戲，
銀幕上Ｄ人講幾多，銀幕下就講幾多。
你唔知仲以為佢地o係度配緊音。
仲要係講Ｄ最隱秘既家事，
你大佬點樣謀你，你奶奶最錫阿二嫂↓
我點能夠同時處理咁多劇情姐？
鬼佬就唔同，鬼佬唔講野既，就算講，人地係用英文講！
咁英文係偉大丫麻。
英文係偉大到，基本上，你識得英文，就代表你有知識。
你見好多阿媽都係咁架：
阿仔，你識英文，你幫我睇下個會計呢條數點計出黎既？
阿仔，你識英文，聽下個摩囉差講緊乜呀？
唉，算喇，你剩係識英文，咁幫我整番部洗衣機啦！
　
拜年
呢幾年，拜年既賀詞之中，最流行o係邊句？
祝你－－不勞而獲。
恭喜你地發財當然好，但係發財，都要有方法。
有邊一個方法，好得過不勞而獲？
不勞而獲既發財方法就係唔駛方法，唔駛方法就係最好既方法。
我地想發財，已經想到到左一個禪既景界！
不勞而獲既然可以成為新年賀詞，我期待o係未來幾年，
我地話人蛇鼠一窩，即係讚佢合群，
話人非奸即盜，即係話佢勇敢！
嘩，真羨慕你呢個家庭，真係蛇鼠一窩非奸即盜。
梗係，唔係我地點會陷家富貴！
　
九七
九七即係我地成個香港俾人標參！
唔好咁講，我地原本就係中國人，九七只係重投母親既懷抱姐！
咁咪即係俾母親標參？
阿媽標仔參，邊個俾贖金呀？
　
死亡
細個果陣，我係唔怕死既。
我覺得，係以前Ｄ人先會死既。
o係歷史書裡面既人至會死。
好多人唔明歷史有乜用，歷史咪話你聽邊Ｄ人死左囉。
我從來未睇過一本歷史書有提到黃子華呢個名，我點會死呀？
最緊要係，就算要死都唔係乜野一回事。
細個果陣隔離陳師奶成日叫佢老公：「咁多人去死你仲唔去死？」
咁阿陳生聽左之後就會出左去ｌａ！
然後去完番黎，阿陳師奶又會話：「死番黎ｌａ，唔死多陣添？」
所以我一路都認為，去死，即係去街，同埋一定唔會去好遠。
因為阿陳生每次都好快就返黎既。
　
黑白不明
我非常欣賞鄧小平既「黑貓白貓，捉到老鼠就係好貓。」
我老友阿雄個老婆生仔，生左個黑人出黎，我都係咁對佢講：
「黑仔，白仔，快高長大就係你個仔啦！」