yogi

迷惘
o係公司，老闆會同我講：
「你番黎唔係訓就係去廁所，你當呢度係屋企呀，呢度係公司呀。」
我番到屋企，阿媽又會話：
「你仲當呢到係你屋企咩，你番黎唔係霸住個廁所就係剩係識得訓！」
「咁...咁我番屋企又唔訓覺又唔去廁所，番公司又唔去廁所唔訓，咁我呢Ｄ野去邊到
做呀？」
不過後黎我諗過自己又係過份Ｄ既，於是我就痛改前非，以後番屋企我就剩係訓覺，番
公司就剩係去廁所。
　
打架
我唔同人打架既。
真係，我咁大個人，從來冇同人打過架。
因為我不嬲覺得，如果你同人打架，o個個人一睇落去就好打過你，咁無理由咁笨。
咁如果o個個人睇落去已經唔夠你打，而佢都要同你打，咁佢梗係有秘密武器啦。
　
老豆
我一向以為老豆，係option黎既，附加gar咋。
無錯，大部份人係有老豆既，就正等如大部份既車係有收音機一樣。
但係o個樣係option黎之o麻，唔係架架車都有。
所以我細個o個陣好憎o的o靚仔成日o係我面前話：
「我老豆點點點......」
我覺得o個Ｄ人好晒命，就好似你有部車，不停咁同人講：
「我部車開蓬gar，大包圍gar！」
你不如話：
「我老豆開蓬gar，用無鉛汽油gar......」
　
愛情
白雪公主，幾咁純潔無瑕。
但係諗真Ｄ，白雪公主，識得o個個係王子，灰姑娘識o個個又係王子，有個有特殊嗜
好，鐘意錫青蛙既女人錫左隻青蛙一啖，隻青蛙變出黎既又係王子！
有冇人諗過根本個王子係同一個人呢？
根本呢個王子都不知幾花心，周圍溝女。
仲無良到扮青蛙去溝添！
　
幸福家庭
細個o個陣，學校有個科目唔知叫做社會定健教，裡面就有幅圖畫，話爸爸會送你番
學，跟住爸爸又會接你放學，好鬼溫馨gar。
後來我睇真Ｄ幅圖畫，送番學同接放學o個個人都唔同樣既。
根本就係兩個人，兩個爸爸！
　
改名
改名，只係Ｄ父母係將自己既主觀意願套係Ｄ仔女身上。
所以大部份女仔唔係叫美乜就係麗乜，男仔唔係叫阿堅，就係阿強，一唔係就係叫阿
祥。
咁我地係咪好美麗，好堅好強好長呢？
　
人生
人生不如意事十常八九，咁即係話，人生最多係得十份之一係過癮gar咋！
我地所謂既人生，無非就即係話，o個十常八九就冇得走雞gar la，依家就即係去飲，
人情又做左la，o麻雀又輸埋la，Ｄ魚又腥，雞又老，魚翅又稀，伙記又惡，你話唔堅
持留到散席，包番幾隻靚橙先走，咁仲係人黎咩？
下次仲黎唔黎就另一回事啦！
　
情竇未開
o係我第一次戀愛之前，我認為自己就係楊過。
而我同書裡面既楊過唯一唔同既地方，就係佢有一隻大鵰。
而我o個陣，就鐘意諗呢個相思多Ｄ。
同楊過一樣，我從來都冇諗過要考第一既。
我只需要愛情，只要我搵到我既小龍女，我就可以拋棄學業，退隱山林，搬入新界住。
但係我一定要住出班西班牙別墅，我唔住得村屋，我怕蛇蟲鼠蟻。
然後每個月至多出一次市區，不過我唔會逗留得耐，問阿媽囉完零用錢我就會番番入
去。
冇錯，基本上，我由中一至中五都係o係呢種咁超然既思想下度過。
當時學校最流行既辯論題目係：中學生應否談戀愛？
我認為，我地應該辯論既係「中學生應否讀書？」
而o係我第一次戀愛之前，我既小龍女只需要有一個條件，就係靚，我知道我咁諗係好
幼稚，但當時我年紀小，唔知道原來身裁都好重要。
十八歲
點解十八歲先至係合法年齡呢？
因為到左十八歲，o係法律上我地就要對自己負責任！
多餘，唔通十八歲之前，我地就唔駛對自己負責任咩？
唔通十八歲之前，我就可以隨時撲出馬路：
「我唔信呀，我十七歲半咋，你敢撞死我？」
唔通十八歲之前，你o係油o麻地踩完個紋身佬一腳，個紋身佬會話：
「死o靚仔，你未夠十八歲，我忍你！」
唉，十八歲既最大好處，就係你到左一個合法既做愛年齡。
我想請問，有邊個做愛係因為合法先做gar？
我以為大部份人做愛係為左快感同高潮？
抑或你想話我聽，十八歲之前做愛係冇高潮既。
十八歲之前做愛係白做既！
咁樣十八歲就具有特別意義ｌａ！
性
聖人話：「食色性也！」
食同色，好唔同！
一個人無論幾鐘意食，會唔會俾幾十蚊入戲院睇套「蒸氣騰騰小龍包」？
一個人無論幾鐘意食，又會唔會為左望住一舊冇野包住既牛肉望到俾車撞？
　
趕絕
細路仔都有性需要，但係唔會講出黎。
因為佢知道，性呢樣野，唔可以講！
因為佢知道，如果佢俾人叫做反斗星，頑皮仔，馬騮仔，其實係變相咁俾人讚緊佢聰明
仱俐。
但係如果你叫佢做咸濕仔，你就即係趕絕佢。
唔信可以番公司試下：
「林小姐，我介紹位新同事你識呀，呢位咸濕仔。」
　
讀書
我讀咁多年書，從來冇一個老師話過俾我聽，讀書係為乜。
但係我自己識諗，我終於想通：
讀書係為左升班。
但係後來有個阿ｓｉｒ同我地班同學講左句野，又令我再諗過。
有一日，佢同我地講：
「你地成班都唔掂，不如你地成班申請留班讀好Ｄ書啦！」
我讀書係為左升班，依家留班係為左讀好Ｄ書...？
　
愛情
戀愛唔係Part time，你唔可以話：「愛？做完咪走ｌａｗ！」
戀愛係一盤生意，你要二十四小時諗住佢。
自己生意，冇所謂Part time正職。
人地放假或者過年過節，你更加要開OT添。
行花市啦行海滂啦睇戲食飯啦...
你有乜野競爭對手呢？
我冇競爭對手既！
你估你係專利巴士公司呀？
港巴都執左啦！
有冇考慮結婚？
咁就要向公眾交代，咁就即係上市啦！
所以，「中學生應否談戀愛」唔係問題，問題係「人類應否有兩份全職工作？」
你再拍拖，需要知會你老闆：
「老細，我出面搵左一份戀愛，我真係好需要呢份戀愛gar，不過公司Ｄ野我會照做，
我兼顧到gar la。」
然後你老闆會話：
「咁你不如搵多份愛情，咪直情唔駛番呢份工ｌａｗ。
　
唔好講野
講野，係冇用既。
做，先至有用。
唔駛講乜呀，愛就係啦。
唔好同我講愛，做啦。
所以，有Ｄ人，熱愛世界，愛得好緊要，於是就做世界。
　
馬克思
馬克思主義係一種理論，係大學裡面既一個科目。
唔好太認真，除非你係學生，主修讀個科。
如果你依家同馬克思講：
「喂，馬生，因為你o個科，單單中國都唔知死左幾多百萬人喎。」
馬克思會話：
「o下，讀書都會讀死咁多人？你地中國日日大考呀？」
　
文明
我一向覺得，人類既歷史上最偉大既三大發現分別係：
第一：牛頓發現地心吸力。
第二：愛恩斯坦發現相對論。
第三：就係唔知邊本雜誌發現自瀆對人體冇害。
排名不分先後。
　
一夜情
一夜情，你需要同對方講：
「去你到定去我到？」
我講唔到，如果由我講，就會係：
「去你到，定係去阿媽到？放心喎，我叫細佬出廳訓咪得囉，咁上格床咪剩係得番你同
我囉？！」
　
男人唔駛靚仔
靚仔係唔係真係咁重要呀？
有Ｄ人話，男人唔駛靚仔既，有才華咪得囉。
係，你有冇試過帶你既才華去落Ｄｉｓｃｏ識女仔呀？
人地Ｄ靚仔一行入去，唔駛二十分鐘，就已經同Ｄ女仔互相問問題：
「你度定我度？」
我帶住我既才華入到去，幾難先搵到個女仔肯俾個機會我。
唔係俾機會我交換問題，而係俾機會天才表演。
唱歌跳舞做話劇講大話功夫表演，成套歡樂今宵一個人做一次......
　
放假
黃：一般人都會好珍惜每年一度既年假！
張：今年我要去夏威夷游下水！
黃：如果決定去夏威夷，你就要預左付出沉重既代價！前四後六！
張：我講緊既係年假，唔係產假，子華！
黃：前四後六既意思係，o係你放假之前o個四個禮拜，同你放假之後o個六個禮拜，都
要做到仆街，因為無論你放幾耐假，你既野始終係你做番。
張：係你既始終係你既！
黃：唔單止，放完假，唔係你既都會變成係你既！
同性戀
同性戀，話就話非刑事化，其實仲係有好多人好反對。
佢地既理由係，同性戀係違反自然，唔自然既。
我心諗，如果講到唔自然，一個五十磅既細路仔，揹住個三十磅既書包番學，而返到學
校仲會發現自己帶漏書，呢樣先叫做唔自然！
一個人每個月，要將佢百份之八十既人工用黎交租，然後每次用完廁所，都要企上去個
屎坑度先至可以開番度門，呢樣就叫做唔自然！
一個人明明係同性戀，你要逼佢去鐘意異性，呢樣野就最唔自然！
邊個要逼佢去鐘意異性姐，你明唔明呀，o的gay佬會攪Ｄ細路仔ｇａｒ。
可能係啦，不過我就肯定，唔會多得過Ｄo麻甩佬鐘意攪Ｄ小妹妹！
　
茄哩啡
我曾經做過茄哩啡，當時我好高興。
因為我記得，我睇過周潤發做茄哩啡，佢只係做衙差，而我就係做兵！
相對之下，等如大家做警察，佢就係做文書，我就出街行必。
威好多！
　
演戲天份
我從小就知道，我係一個偉大既演員。
人地細個成班細路群埋，鐘意玩扮結婚，扮爸爸媽媽。
我細個，就鐘意扮姦夫淫婦。
但係唔知係咪我個樣比較老實，我係從來都無機會扮奸夫。
每次我都係扮淫婦......既老公。
雖然係咁，雖然，我亦都係全班人之中最細o個個，但係我已經可以將一個妒忌既男人
心態表現得淋漓盡致。
當時，我Ｄ朋友個個都讚我，話我天生出黎，就係戴綠帽既。
責任何在？
如果你話我聽，因為我唔靚仔，所以唔可以做戲，你唔應該話我聽！
因為唔關我事，我唔應該負呢個責任，你應該同我父母講。
係佢地攪成我咁既。
如果你要罰，應該罰佢地。
以後，邊個醜樣，就罰佢爸爸，媽媽唔準做戲！
或者剩係做茄哩啡！
我唔係一個唔負責任既人，為左我爸爸媽媽o個短短一剎那既快感，我已經負責負左廿
幾年。
你估做我好易做呀？
我細個讀書唔好，或者唔合格，我冇要父母負責。
我自己簽晒Ｄ成績表既。
每當我爸爸媽媽有爭執鬧交既時候，我有冇叫佢地為左我既童年著想，忍下對方？
冇！
我叫佢地出街鬧！
我大個左，唔知應該信邊個宗教，唔知做人為乜，唔知人生事業既方向，都冇要求父母
照顧我。
反而係我調番轉頭，提醒佢地：
你地要搵錢呀，積穀防飢呀，唔係第日老來無依無靠呀！
乜野都係我！
　
愛情大佬
我地拋得個身出黎愛，唔通有得愛唔愛呀？
　
隆胸
葉子微簡直為演藝界創下新標準。
以後Ｄ女仔想做明星，又唔駛睇樣，又唔駛睇演技，行入黎，磅一磅就得o勒。
「開黎六斤半，片酬即係六千五蚊一日，小姐做唔做？」
「開黎八斤有疤痕，八千減一千疤痕費，即係七千蚊一日。」
幾客觀呀！
　
兒童教育
我一向都認為，我地成日呃Ｄ細佬仔，懶係ｎｉｃｅ咁對佢地，講到呢個世界乜野都好
好咁，咁係唔o岩既！
細個我同媽媽搭飛機，睇見廁所既水係藍色，我未見過，咪走去問媽媽o個Ｄ係乜？
媽媽話：「係天空。」
所以我就成為世界上第一個食過天空既人。
細個Ｄ大人成日講童話，講白雪公主。
佢地講既就係白雪公主又靚又好人，好值得去追求。
但係冇講到我地唔係白馬王子！
邊個人至係白馬王子呀？
起碼有隻白馬啦。
咁就即係馬主啦，你係唔係呀？
講Ｄ唔講Ｄ好危險。
即係等如你同個細路仔講：
「小明，飛出窗口好過癮既，成個香港望晒ｇａｒ，浮下浮下...」
但係唔同佢講：
「不過你落到地下個陣，會快過搭電梯好多！」
　
自重
當乜野人都唔搵我做野，我就知道，我係一個偉大既藝術家，在生既時候係唔會獲得應
得既尊重。
唔止咁，我仲偉大過偉大既藝術家，因為我知道，我死後都不會受到尊重。
　
紅館
依家做歌星，好犀利，因為有紅磡體育館。
因為呢樣野，做歌星，可以o係一晚，就賺晒你地朝九晚五一世人都搵唔到既錢！
Ｄ人話，我真係唔明張國榮點解要退休，佢一晚已經搵左你一世搵既野，佢一晚已經做
左你一世人要做既野，仲有乜野可以做？
唔退休做乜？
做五場。已經輪迴五次！
做三十場，輪迴三十次，如來佛祖都話：駛唔駛？
Ｄ人話，唔係既，佢唔捨得退休既！佢最後o個場演唱會，佢自己都喊。
佢係喊，不過唔係為自己喊，係為左你地喊呀：
「我就退休ｌａ，我聽日就唔駛DO o勒。你地聽日仲要番九點，唔好遲到呀！」
　
失戀
失戀係會令人成長既。
我失戀之前，一向都覺得世界上所有問題都有答案。
點解我地每日都要８點鐘起身返工呀？
因為夠鐘囉。
點解我地有夠鐘呢樣野呀？
因為我地唔用浮動上班時間囉。
　
點解呢個世界有戰爭？
因為我地有武器囉。
咁點解我地要有武器呀？
因為佢地有武器囉。
　
一切都有答案，直到我失戀。
阿珍，點解你唔愛我？
阿珍比左一個經典既答覆我，佢話：
愛情係冇點解ｇａｒ，係唔可以解釋ｇａｒ，唔好問啦。
如果番學阿ｓｉｒ問我野都可以咁答就好o勒！
黃子華，物體燃燒點解需要氧氣呀？
阿ｓｉｒ，係冇點解ｇａｒ，係唔可以解釋ｇａｒ，唔好問啦！
泳池
黃：去公眾泳o個Ｄ唔係叫做游水，o個Ｄ叫做浸水。
　　因為o係公眾泳池游水，只可以用一種泳式，就係彈式，同一個位，彈下彈下。
張：如果係高手可以用四式，但係要潛落水底o個度用。
黃：點解Ｄ泳池有咁多人？
張：唔好問呀，趁人多你好快Ｄ浸下，等陣所有人上晒水o個陣，你就會發覺，個池Ｄ
水原來到膝頭哥ｇａｒ咋！
黃：其實我地香港人都習慣左人多，去浸下水都好，但係可惜既係，呢Ｄ水，唔係一般
水，呢Ｄ係暖水，成日有Ｄ友仔，企o係個泳池度，全身唔郁，眼碌碌！
張：下，o係度屙尿咁冇公德心！
　　由細到大我爸爸都教我，急尿，去隔離池丫o麻！
黃：所以我係度，趁呢個機會，同你Ｄo靚仔講呀！
　　游游下小童池走黎游大池，擒o係個池邊，唔好話我聽係學游水呀！
張：特別係擒正o係噴水口o個Ｄ呀！
　　想毀屍滅跡呀？！
　
金勞
點解要帶金勞？
唔帶勞，有乜資格同人講，時間係寶貴？
我既時間點值錢？
o拿，支時針圍住行一個圈，１２個鐘，十幾皮野，即係為皮幾野一個鐘。
你一個鐘值幾錢丫？
幾舊水？
我點同你一齊食飯呀，大家時間觀念咁唔同！
唔單止咁，你帶勞，表示你個人有幽默感。
勞力士，有邊個靠勞力搵食既人帶得起勞力士丫？
越帶勞力士既人就越表示佢唔駛用勞力！
呢Ｄ，就叫做幽默啦。
　
菲傭
ＨＫ有幾多菲傭？
你睇下ＨＫ有幾多人生仔就知。
Ｄ人生仔，一定要有菲傭，到一個地步，生仔冇老婆唔緊要，但係冇菲傭就唔得。
所以有Ｄ人覺得，同個菲傭生一個，咁就最一舉兩得。
　
世界和平
呢個世界，乜野國家地域主權，其實同去廁所冇分別。
甲：喂，邊個o係裡面呀，出黎啦。
乙：我黎先ｇａｒ！
甲：喂，比我入黎丫，一齊丫。
乙：黐線，用廁所都有得一齊？
冇錯，如果人類可以習慣一齊用一個廁所，呢個世界就唔會打仗。
啊，你要入黎呀？等等，我坐過Ｄ，你坐前面，痾唔痾到？
　
性教育
有關性教育，父母唔識教，示範識唔識？
佢地識，但係冇機會示範，因為每晚一到示範時間，爸爸就會話：
九點ｌａ子華，仲唔去訓？
九點就叫我去訓？你估我係農夫呀？
可能佢地其實唔介意示範，不過唔知道我有咁既需要？唔知？
我日日睇姊妹雜誌，真係為左睇時裝呀？
唔知！根本大家心知肚明，不過詐作不知。
既然大家都咁虛偽，咁以後咪當屋企係社交圈子，大家客客氣氣咪算囉。
－－爸爸，家母問你今當晚番唔番黎食餐便飯喎？
－－阿媽，你先生話家常便飯唔好打攪你喎。
－－阿細妹，令尊叫你落街買份報紙，點解唔叫我？
我係令兄，信唔信令兄摑令壽堂個千金呀？
　
共產主義
我有４００蚊，做得同志，冇理由唔囉出黎大家分左佢咁衰仔係咪先？
好ｌａ，４００蚊４個同志分，每人有一舊水。
依家我４００蚊分俾１２億個同志，每人有幾多？
你叫馬克思心算丫，我包佢唔識計！
共產主義唔係話唔好，你成個國家都係得４個人咪幾好囉！
仲要係最好其它o個三個人都有錢過你！
深水埔
深水埔，真係好恐怖！
我仲記得，o個陣我o係深水埔既廁所...
就正如大部份深水埔既廁所一樣，係度身訂做。
即係，你有幾大個，個廁所就係幾大個。
你痾屎痾尿洗頭沖涼刷牙剃鬚都o係o個度！
於是，好多時好奇妙既事會發生。
好多次，我o係廁所沖完涼出黎，就會發覺：咦，點解我仲急既？
點解會冇左半卷廁紙既？點解？唔知，好恐怖！
一係，去完痾尿，又會發現全身都係番鹼黎既，好恐怖！
更加恐怖就係，每次有朋友黎，用完我個廁所之後，都會o係度門到寫Ｄ：
阿珍，我永遠愛你。或者係，肥明正屎忽鬼↓諸如此類。
就算係乞兒呀，深水埔o個Ｄ都勁Ｄ！
全港最大最結實既髻就o係深水埔！
點解？因為佢地用左o個隻Ｇｅｌ，叫做ＶｉＤａｌ－ＳＨＵＭ　ＳＨＵＩ！
　
銀行存款
一個銀行存款得４位數字既人同一個患左絕症既人係冇分別。
大家都係得幾個月命！
我覺得呢Ｄ人可以去申請入院，姑娘問：乜病呀你？
姑娘，我死ｌａ，我諗我有左四位數字！
Ｄ人話，吸煙危害健康，梗係啦，一包煙幾廿皮，食十包，冇左幾舊水，唔短幾日命？
根本乜野都危害健康。睇戲又危害健康，ＫａｒａＯＫ又危害健康。
Ｓｈｏｐｐｉｎｇ？唔好ｌａ，上年ｓｈｏｐ過一次，差Ｄ過唔到年！
　
賭馬
喂，賭馬係需要付出好多ｇａｒ。
朝早要睇晨操夜晚要睇董鏢，又要同朋友交換讀書報告。
你估我地睇得書少？市面幾多馬經呀？
仲唔係話你睇得多就得ｇａｒ喎！
香港Ｄ馬經，一場十隻馬，十隻馬都有人貼，你自己思想唔夠獨立咁你就死梗ｌａ：
唔該，呢場每隻幫我落１００蚊丫！希望中ｌａ！
夏天黎ｌａ，抖暑ｌａ，你估係俾Ｄ馬休息咩？係俾我地休息呀！